兩個星期冇煮嘢食，今日早起身就整個蛋卷俾肥仔啦！
月: 十一月 2016
豐盛節 – 嘉道理農場暨植物園
 |
| 自制花盆 |
豐盛節 11月12至13日
早排有留意開Facebook既應該都被嘉道理農場個sponsor廣告日日洗牆。好啦見咁大自然又多手作野玩，小肥子一家上星期日就出發去玩喇! 之前post提過嘉道理農場係值得一去再去既地方，咁岩今次有個<<豐盛節>>顧名思義就係豐收既日子，旨在感謝大自然賜予我地生命力量既訊息。
入場$30/人，一上樓梯到平台就見到好多攤位做特色手作如浴鹽制作、自己畫既盆栽、大自然樂器等 – $10/次。再行上D就有免費印度彩繪、粉筆畫創作、面部彩繪等等，仲有好多本地手作擺檔。如果預先報名的話仲有大自然工作坊可以參加好似 – 秋日漬物、秋冬特飲等。Well，確實有好多野睇同玩不過排隊都要等好耐。
小肥子一家制作左個花盆(最後交由肥爸美化)，工作人員種左2塊葉係我地個花盆到就完成喇! 肥仔同肥媽仲整左印度彩繪!開心到肥仔不停指住我手用BB話同我地講: “媽!我都有呀“
Overall 今日好好玩，希望有更多類似既節目俾香港人!
嘉道理農場暨植物園 (Kadoorie Farm and Botanic Garden)
香港新界大埔林錦公路
交通: 九巴64K
泊車: 免費停車場泊入園內 (星期六日去的話要預早book泊車)
蚊患程度: 中
上堂
 |
|
好專心上堂………… 左3分鐘
|
保護色
青龍頭-圓墩 (大欖郊野公園)
 |
| 牛牛+小肥家 |
想行個山睇風景又唔駛排隊等影相,而且BB車都去到既地方呢到有一個: 青龍頭 > 深井沉澱池 >圓墩
 |
| 深井沉澱池 |
全程慢行只需要個半鐘，冇樓梯，風景同大棠差不多。揸車去青山公路到青龍頭宜泊到深井沉澱池。一個好平靜水清清既池+一山岥斜路，肥仔坐係我前面望左個池好耐都唔捨得走(你係咪訓左覺呀其實?) 沿番條路行去大欖自然教育徑 圓墩民安隊訓練營地。
民安隊呢邊有2個大草地，第一個近入口草地細DD，行入D第二個草地大但係好多牛牛同牛屎，建議要草原奔放去入口處草地。
小肥子第一次見牛牛好興奮，竟然唔驚主動走過去同佢地say hi! 嗯..你記住小心牛屎呀BB, 媽媽唔想洗牛屎呀….
沿路出番去走人，衰仔唔肯行唔肯坐車仔一定要抱! 攰死我喇..
青龍頭–圓墩 (大欖郊野公園)
青山公路入
交通: 青山公路青龍頭碼頭下車，沿車道往上行走
泊車: 直接揸上深井沉澱池
其他: 無補給, 自備食物同水
蚊患程度: 低
南生圍
南生圍因小鱷魚「貝貝」而開始有名，一個充滿自然生態的綠洲。
踩單車，放狗，pre-wedding拍攝勝地。除左垃圾桶外，隨隨便便影相都係靚。一個好自然既地方被錦田河及山貝河包圍，有大片草地景色優美。
揸車直接揸到入大草原又得，係元朗西鐵站步行去橫水渡過河亦得，可以運到單車BB車架! 一過河就會見到有幾間士多可補給，沿著河邊遊一圈如無意外係唔會走失好易行。行15分鐘左右就會到好好好多人影相既婚紗之橋喇! 假日想行過去影相係要排隊的，提提大家條木橋以前因為太多人上去，老化問題日益嚴重已經倒塌過一次，而家係再起過架! 希望各位好好愛惜呢條木橋。**by the way剛剛10月中去過條木橋而家都鬆鬆地要小心上落。
再行入少少就會去到大草原，好多人會係到放狗野餐同放飛機，同埋—– 肥仔自由奔放既開始….
唔知係咪近年多左國內同胞，眼見南生圍隔一段路地下就見到垃圾膠樽同多左蚊。唔該各位遊人自己帶走垃圾出番去先掉。
>>南生圍 (Nam Sang Wai)
元朗
點去/交通:元朗西鐵站G2出口>元朗舊墟路>山貝路>南生圍” 的指示牌>横水渡船的碼頭
揸車: 可直入南生圍路，不過盡量避免泊架車係到啦! 始終單程路又係自然生態
嘉道理農場暨植物園
呢到對小肥媽唔會陌生，因為基本上嘉道理農場係小學生必去既學校旅行地方，亦都係好多20年前既80後小朋友同爸爸媽媽family day好去處。
山谷清溪，保育，菜園，自然教育，動物，專車導賞 > 呢個就係嘉道理農場帶俾你既野。 入場費$30/成人，可以俾多$10有專車導賞團(唔好睇少呢$10, 佢真係會帶你由山頂玩到落山腳)
地方好大任跑，岩晒小朋友放電。帶小肥子黎既時候剛剛係佢學識行既果段日子，所以小肥子經常扭落地唔駛我地抱住真係輕鬆好多，唯一就係你要親眼望住佢不斷跌企再企起身….行得好慢好慢。我地下晝黎到嘉道理農場，只係山下睇下農作物同動物清溪都玩左3個鐘，每季都有好多特色植物同靚地方取景影相。好啦!我地等佢個秋季豐盛節再黎啦!
PS 好慶幸佢仲屹立係大帽山冇俾地產商鏟走。
>>嘉道理農場暨植物園 (Kadoorie Farm and Botanic Garden)
香港新界大埔林錦公路
泊車: 免費停車場泊入園內 (星期六日去的話要預早book泊車)
